Competition

सूरसंगत संस्था ही कै. रामभाऊ कुंदगोळकर उर्फ सवाई गंधर्व हयांचे जावई डॉ. वसंतराव उर्फ नानासाहेब देशपांडे ज्यांनी १९५३ साली 'सवाई गंधर्व पुण्यतिथी' सुरू केली व सातत्याने २५ वर्षे साजरी करून तिला दर्जा प्राप्त करून दिला, त्यांच्या स्मरणार्थ स्थापन केली. सूरसंगत संस्था स्थापनेचा हेतू नवोदित गायक व वादकांना प्रोत्साहन देऊन त्यांना स्वरमंच उपलब्ध करून देणे हाच होता. नवोदितांबरोबर प्रथितयश कलाकाराला पाचारण व्हायचे.

संस्थेने आतापर्यंत जवळजवळ ८० कलाकारांचे अभिजात शास्त्रीय संगीताचे कार्यक्रम केले आहेत. संस्थेने या वर्षी डॉ. नानासाहेब यांच्या पत्नी कै. प्रमिलाबाई देशपांडे यांच्या जन्मशताब्दीनिमित्त नवोदित गायक कलाकारांसाठी स्पर्धा आयोजित करण्याचे ठरविले आहे.

संस्थेच्या कार्यवाह सूरमणी सौ. पदमा प्रभाकर देशपांडे ह्या कै प्रमिलाबाईंचा स्नुषा म्हणजेच कै. सवाई गंधर्व ह्यांच्या नातस्नुषा म्हणून प्रसिध्द आहेत. त्यांच्या स्वरपद्म भाग १ आणि स्वरपद्म भाग २ अशा २ (दोन) सिडीज सवाई गंधर्व भीमसेन महोत्सवात २०१२ आणि २०१३ साली प्रकाशित करण्यात आल्या. ह्या सिडीमध्ये त्यांनी बांधलेल्या आणि गायलेल्या ७५ बंदिशी आहेत. त्यामधील १५ बंदिशी त्यांच्या शब्दांसहित सूरसंगत संस्थेच्या SWARPADMA2020 या YouTube Channel वर उपलब्ध आहेत.